Mien neeie Scheer

Mien neeie Scheer

 

Dreei Scheren harr ik in mien Single-Huushollen. Harr ik. Een in de Köken, een in de Baadkamer, een  in mien Arbeidsrüümte. Ik segg meest van Dichterklause, man so vööl Romantik sitt daar neet in. Vööl Papier, Computer, Boken, un dat all’ en bietje dörnanner. En bietje riekelk dörnanner. Un tomaal wassen mien Scheren weg. Allmitnanner. Been hebben se neet, Flögels ok neet, un inbroken hett hier ok nüms. Man se wassen weg. Tominnst een muss ik eerstmaal weer hebben. Warr kriggt’n sowat? Drogeriemarkt! Wat dat daar neet gifft, dat gifft’t heel neet. Ik kreeg ok en Scheer, up en  Stück dicke Papp monteert. Universalschere, flink und sauber, stunn daar up. Un noch en hele Bült in lüttje Bookstaven. Ok dat, wat nu kummt:

PL Nocyce universalne, Wyprodukowano w chinach

HU Univerzalis ollo Szarmazasi hely:Kina

CZ Univerzalni nuzky. Vyribeno v Cine

un up Düüts noch heel lüttjet in de unnerste Hook: Hergestellt für  www  keerluppeerd.....

Ik harr as düütse Verbruker - of heet dat nu ok al User -  doch to geern wusst, of disse Scheer viellicht noch >düütse Weertarbeid< is. Vör en Rieg van Jahren stunn d’r meest wat van >Solingen< up. Nu steiht d’r blot noch, för welke Firma de Scheer maakt wurr. Dat de ut China kummt, vertellen se blot de Polen, de Ungarn un de Tschechen. De Düütsen sölen dat schiens neet weten. Up Düüts steiht d’r blot, dat de Scheer för en >Keerl up Peerd<  maakt is. Dat weet ik ok so. Daar hebb ik de köfft. Dat steiht daar groot an de Winkel schreven .....      

Ik overlegg nu al siet vanmiddag, woso ik dat neet weten sall un mi dat eerst ut en anner Spraak oversetten mutt. Man nu weet ik tominnst, dat China up Ungarisk Kina heet un up Tschechisk Cine. Anners harr ik dat ehrder för en Kino hollen, so as dat  Apollo in Emden. Cinema of so. Man viellicht worren in’t Apollo-Theater ok bold Scheren maakt. Well weet dat al?

De Politikers komen allmetts up arige Ideen. Besünners, wenn se in de Kniep sitten. 

 

 

Druckversion | Sitemap
© Ufke Janssen