Cyber Leevde

 

 

Biggi is för mi  d a t  Bispill för de Leevde >by Internet<. Biggi geiht up Jagd. in’t Internet, up Jagd na Mannlüü. Egentlik stimmt dat neet, wenn d’r ok sowat bi herutkummt. Se will neet eenfack Mannlüü jagen un infangen. Se will blot een, hör >Mr. Right<, de Keerl, de jüüst so utsücht un ok so funkschoneert as se sük dat vörstellt. De mag’t ok wall geven, man denn seker blot eenmaal up de Welt, van Kap Hoorn bit an’t Noordkap. Viellicht mutt se de Noordpol un de Antarktis un de paar hunnert Lüü, de daar in hör Basen sitten, in hör Söökreveer insluten. Daar kummt ok wat bi herut. Sowat as de Argentinier, de se annerlesdens >an Land trucken< harr. Mit vööl, to vööl Versprekens, van beid’ Sieden, versteiht sük. Dat passde denn achtern un vöörn neet, unnern un boven ok neet, as se sük ennelk in de Ogen kieken kunnen.  Dat is ok keen Wunner, wenn de beid’ Partien sük tegensiedig in’t Nett wat vörlegen, as wenn’t um en Weltmeesterskupp gung, in’t Legen natürelk. Armando is de anner Dag na Südamerika flogen .... un nüms hett hum bit vandaag weersehn. Slump hatt!

De hele Upregen harr neet nödig daan, wenn Biggi, to’n Bispill, in’t Stadion gahn was. Of up de Bowling-Bahn. Of in en Vereen, waar vööl Mannlüü - un mienwegen ok Fraulüü - hengahn un waar’n de Lüü sehn un hören un viellicht sogaar anfaten kann. Daar kann’n futt negentig of viellicht ok negenunnegentig Perzent utsorteren un bruukt daar neetmaal en Computer för. All’ hör Bekennden hebben hör dat anraden - man Biggi is tegen Beraden, wo heet dat noch so mooi, resistent. Se mutt schiens eerst vööl Tied in’t Internet verkökeln, sük eerst in de anner >User< feern-verleven un hum denn doch utsorteren. Viellicht hett se daarhento al mennigeen Stünn mit hum in’t Bedde tobrocht. Mit hum up de Scherm, de Bildscherm van hör Tablet. Up’t Lesd was hör dat doch neet genog west. So en Tablet is up de Düürte würkelk nix to eien, to tuutjen, in de Arms to nehmen un so wieder ....  Vör allen nix för Unsowieder. Daar is dat leep unhannelk för. Ik weet dat, du weetst dat, elk un een weet dat. Haast elk un een.

Sull Biggi mit hör mehr of minner veertig Jahr daar noch achter komen?

Tablet döggt neet för’t Bedd. Un Tellers ofwasken deit dat Dingerees ok neet.

 

 

Druckversion | Sitemap
© Ufke Janssen